Kelaguan baba kita, betawi tempo doeloe

BETAWI TEMPO DOELOE

Kelaguan baba kita

Apa nyeng di kerjain sama baba dan engkong kita dulu, emang rada aneh kalo ukuran buat orang sekarang,tapi dari keanehan entuh ternyata banyak sisi manfaat nyeng kita dapet.

Baba kita dulu kalo mo gosok gigi pake pecahan genteng,di gedigin ampe alus entuh genteng abis entuh diperodin dah di gigi,abis diperodin keja rata baru dah digosok -gosok make jari,sekiranya udah cukup entuh dikumurin pake aer dan hasilnya emang diluar dugaan entuh gigi jadi rada bersih,udah begitu nyeng namanya baba dan engkong kita jarang nyeng pada sakit gigi, padahal giginya diperodin ama abu genteng.

Mandi biar bersih kaga bedaki cuman pake batu kali nyeng rada entengan buat gegosokan,kaga pake sabun paling biar wangi aernya dipakein kembang nyeng tinggal metik di joganan rumah,lah entuh genengan engkong ama baba kita awaknya pada sehat kaga pada kegatelan.

Ngerokin kuku nyeng pada item kaya klipaan,biasa nya kalo kita abis ngupas.jengkol muda entuh kuku kita manting item kena getah nya,ketauan nya pas kita abis maen disawah..ngebersiinya kaga pake beli cuman ambil pecahan semprong lampu, kita kerik dah kuku kita lah pada putih lagi genengan,kaga mesti kudu kesalon tapi cuman lari kekebon nutur beling semprong ntuh kuku udah pada bersih lagi dah atawa dulu bersiin kuku biar pada melisnang pake daon benda nyeng udah kering,make nya entuh daon benda nyeng rada kesed kita gosok-gosokin ke kuku,kuku nyeng udah item jadi pada putih lagi dah.

Nyuci piring kaga pake deterjen pembersih piring ,cukup ambil abu gosok atawa abu dapur ge entuh piring nyeng pada bau amis dan bau laen nya pada ilang,bersih lagi kaga bekuman,malah kata orang nyeng ngerti mah abu gosok bisa bikin mati kuman, soalnya proses bikin abu gosok kan dibakar dulu ampe lama tuh biang kuman go pada mampus angus kebakar,entuh abu bukan aja buat nyuci piring dan perabotan laen tapi juga buat nyiangin ikan gabus biar kaga merijil pas lagi disiangin,biar amisnya ilang dan rada kesed.

Begitu dah nyeng namanya orang dulu ,dengan keluguan dan kekurangan nya tapi bisa idup akur, guyub dan kaga kenal kata nyeng namanya ngeluh,apa ge diterima, mangkanya hidupnya sehat,berkah dan panjang umur….

Betawi, 14 Agustus 2019
Sumber : Bang ILok